Pagkabilanggo humalin apat tubtob 12 anyos ang atubangon sang empleyado sang Provincial Capitol nga si Rodolfo Redulla Salazar, Jr. 51 anyos matapos ini napamatbatan guilty beyond reasonable doubt sa kaso nga reckless imprudence resulting to homicide, mutiple physical injuries kag damage to property.
Si Salazar ang Administrative Head 2 sang Office of the Provincial Agriculturist (OPA).
May 18, 2016 sang nagamaneho ini sang isa ka L200 pick-up sa Barangay Balingasag, Bago City sang iya nabungguan ang tricycle nga ginamaneho ni Noel Serva.
Patay sa amu nga hitabo ang 25-anyos nga nurse nga si Berlin Mondia Bedayo, samtang pilason naman ang mga upod man sini nga mga nurse nga sanday Lea Surmaco, 36 kag Paula Ureta, 34 lakip man ang driver nga si Serva, 56.
Nagpalagyo si Salazar sakay sa bus papuli sa ilay balay kag nag-opisina pa bangod sa kahadlok apang gin-aresto ini sang mga pulis sa ulihi.
Rason nya nga mahinay ang iya dalagan apang bangod kay may sugata nga pwerte ka silaw sang suga, wala nya na natalupangdan ang tricycle.
Ang pamatbat ang gindagdag ni Judge Frances V. Guanzon sang Bago RTC Branch 62.
