Maga-apply ang Philippine Agricultural Commericial Industrial Workers Union – PACIWU sang transport trike sa Department of Labor and Employment – DOLE angot naman sa nagapadayon nga family feud sa management sang Vallacar Transit.
Suno kay PACIWU national president Hernane Braza nga maga-file sila sang notice of strike sa National Conciliation and Mediation Board(NCMB) sa DOLE diri sa syudad sang Bacolod.
Ginpaathag ni Braza nga lakip sa ila ground for strike amo ang harassment sa mga union officers kag violations sa ila economic provision kaangay sang delay sa ila mga benepisyo.
Suno kay Braza ang mga high-ranking officers sang Paciwu ang nagapangatubang sang legal charges bangud sang ila nangin tikang sadtung July 14 sa diin ginakabig naman ini sang management ni Roy Yanson nga distabilization bangud nga nagatuyo sila nga gub-on ang operasyon sang Ceres.
Dugang pa sini nga madamo na sang mga empleyado ang naga-reklamo bangud antis pa man sang natabu nga take over, binulan na nga ‘delayed’ ang retirement pay , separate pay , incentives, mutual aide fund kag iban pa nga claims sang mga trabahante.
Ginapasalig sang PACIWU nga paga-sundon nila ang proseso sang layi angot sa pagpatigayon sang transport strike sa diin dapat mayoriya sang ila miembro ang mag-upod sa ila nga kawsa.
Pabutyag sang union president nga untat byahe amo ang ila nakita nga pama-agi agud nga maghulag diri ang management bangud samtang nagalawig ang gumuntang sa tunga sang pamilya Yanson, mas ma-apektuhan diri ang mga ultimo nga empleyad ilabi na ang commuting public.
