Nagalab-ot sa 138 ka mga pamilya ukon yara sa 657 ka mga indibidwal ang nagbakwit, matapos nga apektado sang nagluntad nga engkwentro sa tunga sang mga katapo sang 27th Infantry Batallion Philippine Army kag ginapatihan miyembro sang New People’s Army sa bahin sang Sitio Lemtenineg, Barangay Kematu, T`boli, South Cotabato kahapon nga adlaw.
Ang nasambit nga mga bakwit ang nagapabilin sa subong sa Kematu Elem. School sa nasambit nga banwa.
Suno kay Provincial Disaster Risk Reduction and Management Action Officer Mila Rivera ang nasambit nga mga residente ang halin sa mga Sitios sang Lemtenineg, El-Lubog kag Blangas, Brgy. Kematu sa nasambit nga banwa.
Apang paklaro ni Rivera nga ang yara sa 226 ka mga indibidwal nga nagbakwit nga halin sa El-Lubog kag 258 sa Sitio Blangas ang natalana nga pabalikon subong nga adlaw sa tion nga maassess ang sitwasyon sa ila lugar kag mapaidalom sila sa psychosocial stress debriefing, matapos nga indi man sila direkta nga apektado sang engkwentro kag nagbakwit lang ang mga ini tungod sa kahadlok.
May-angot sini, ang posible magapabilin lang sa evacuation center ang 37 ka mga pamilya ukon 137 ka mga indibidwal nga amo ang direkta nga apektado sang engkwentro tubtob nga macleared sang militar ang ila nga area
Ginkumpirmar man ni Maam Rivera nga tigayon na sila nga nakapatigayon sang relief operations sa mga bakwit upod ang PRC kag MDRRMC Tboli sa Kematu Elem. School.
