Anaa na sa luwas nga kahimtang ang usa ka sundalong nasamdan human ang nahitabong engkwentro tali sa 1st Special Forces Battalion ug New Peoples Army kon NPA nga ubos sa Sub-Region Committee o SRC-4 sa North Central Mindanao Regional Committee sa Brgy Kaatu-an, Lanatapan, Bukidnon.
Sa interview sa RMN Malaybalay ngadto kang BGEN. Edgardo de Leon, ang commanding officer sa 403rd brigade gibutyag niini nga gamay nga samad lamang ang na-angkon sa sundalo nga si PFC Perez.
Matud ni de Leon nga mas luwas na usab ang katawhan sa maong nga dapit tungod kay na-abog na niini paingon sa lasang nga bahin ang mga NPA.
Sa wala pa ang engkwentro, gibutyag ni General de Leon nga adunay mga NPA nga ilawom sa SRC 4 ang nitahan sa kasundaluhan bitbit ang 9 ka mga armas niadtong nakalabay nga semana.
Tungod sa mao nga pagtahan, gitudlo niini kung asa nahimutang ang ilang mga kaubanan kaniadto, maong naghimo ug combat operation ang kasundaluhan sa mao nga dapit.
Nagtoo ang heneral nga ilawom sa perimeter patrol sa mga NPA ang ilang na-engkwentro niadtong Sabado sa udto aron i-alarma ang ilang main body aron makasibat.
Gipahayag pa ni de Leon nga ang mao nga engkwentro nagpamatuod nga aduna gayu’y presensya sa NPA sa mao nga dapit hinungdan nga mas pahugtan pa ang ilang military operation sa lugar.
Una nang nigawas sa inisyal nga imbestigayon sa kapulisan nga mukabat sa 10 ka minutos ang nahitabong engkwentro.
