General Santos City- usa patay samtang usa angol sa nahitabong engkwentro tali sa kapulisan ug gituohang armadong grupo sa lungsod sa Tupi, South Cotabato alas 11:50 ang takna sa gabie niadtong nakalabayng adlaw.
Giila ang suspek nga si Ellido Dani, 55, residente sa Barangay Kablon, Tupi. Sikop sab ang mga kaubanan niining silang si Mangilay Dani, 40, miyembro matud pa sa militar ug Marcelino Dawang, 35, usa ka mag-uuma.
Samtang angol ang pulis nga si PO1 Ramil Villion kansa napusilan sa mga suspek sa iyang mga kamot ug tiil.
Gibutyag ni Police Senior Inspector Bernard Faldas, hepe sa Tupi PNP nga una na silang nakadawat ug impormasyon gikan sa usa ka pulis nga sakop gihapon sa Tupi PNP nga matud pa duna kini nakabingkil sa usa ka tindahan sa may Kablon Tupi kansa armado matud pa ug pusil.
Tungod niini mirespondi ang Patrol Car sa Tupi PNP sa lugar, apan wala na nila maabtan ang mga nasangpit hinungdan nga ilang gigukod. Didto na nila kini naabtan sa may Crossing Acmonan.
Tungod may armas gisita sa kapulisan ang mga nasangpit apan inay mo-cooperate, nagpabuto nuon ug pusil ang usa ka suspek nga maoy nakaigo sa pulis nga si Po1 Villion. Tungod niini mibalos ug pabuto ug pusil ang tropa sa Tupi PNP nga hinungdan sa pagkaigo sa suspek nga si Ellido Dani nga hinungdan sab sa iyang kamatayon.
Narekober sa lugar ang usa ka unit sa kalibre 45 nga pistola, samtang mga dinakpan gilayong gibalhog sa silda sa Tupi Municipal Police Station.
