CADIZ CITY – (3rd Update) Wala nagapati ang amay sang nasapwan patay nga maestro sa ciudad sang Cadiz nga naghikog ang iya bata.
Sa interview sang DYHB, ginpahayag ni Engr. Benjamen Geronga, tatay sang biktima nga si Eric Geronga nga indi mahimo sang iya bata nga maghikog bangud nga sa iya ihibalo, wala ini sang problema personal, wala problema sa kwarta kag wala man sang ginabatyag nga balatian.
Suno kay Engr. Geronga nga indi ma pwede masiling nga naghikog ang iya bata bangud sa problema sa trabaho bangud nga mabuot ini kag palangga sang iya mga co-workers.
Madumduman nga nasapwan ang bangkay ni Eric pasado las 12 kahapon sang udto nga nagakayaon sa kampo sang tubog ma 500 metros lang ang kalayuon sa ila balay.
Nahibaluan nga ang 37 anyos nga biktima ang isa ka head teacher sang Aniceto Lacson Elementary School sa Cadiz, kasado kag naga-puyo sa Santa Maria Pueblo Subdivision, Brgy. Daga, ciudad sang Cadiz.
Base sa imbestigasyon sang pulis, ang biktima ang may igo sang bala sa tuo nga bahin sang iya ulo kag wala nakalapos ang bala.
Nakita sa iya tiilan ang isa ka .357 nga kalibre sang armas kag may lima ka bala nga wala nakalupok kag isa ka basiyo. Nakita man ang holster sang iya pusil malapit sa iya kamot.
Sa karon gina-usisa na tul-id sang Cadiz PNP kon bala nag-suicide ang biktima ukon ini ang ginhungod nga patyon./dyHB BACOLOD
