General Santos City–Gikumpirma ni Police Lieutenant Giogenez Hare, ang labaw sa Sto Niño PNP nga napasakaan na nila ug kasong pagsupak sa Sec.11 sa RA 9165 ang suspetsadong si Dhapne Dacula, 22 anyos, estudyante nga nanimuyo sa, Purok Tagumpay,Brgy. Ambalgan, Sto.Nino, South Cotabato kansa nasikop ug nakuhaan sa kapulisan ug droga sa operasyon niadtong adlaw nga Sabado.
Kahibaloan nga una nang nasikop ang suspek sa hiniusang pwersa sa mga personahe sa Sto.Niño PNP ingon man ang PDEA-12 South Cotabato human gipakanaugan ug search warrant no. 142 nga gipagawas ni Judge Marlo Brasales, Presiding Judge sa MCTC sa Norala-Tboli ug Sto.Nino, Norala Sot.Cot.
Nasayran nga nakuhaan ug tulo ka sachet nga gituohang shabu ang suspek nga estudyante atol sa operasyon nga nagkantidad ug 9,000 mil pesos.
Sumala pa ni lt hare nga wala sa ilahang watchlist ang suspek apan dugay na nilang ginamonitor sa lugar nga padayon nga nakipaglambigit sa droga.
Sa kasamtangan pabiling nagtingkagol sa selda sa Sto Nino PNP ang dinakpang estudyante. (Reynald Timario)
