General Santos City–Gikakurat sa mga silingan sa estudyanteng si Darwin Rosauro, 23 anyos, residenti sa Olarte State, Barangay Labangal, Gensan ang pagpamusil kaniya alas 5:45 ang takna sa hapon, niadtong adlawng Martes.
Matud sa silingan sa biktima nga itago lang sa pangalang Alias Inday, nangayog pakitabang kaniya ang biktima human kining gipusil sa usa ka lalaki nga natigayon sa tindahan duol ra sa ilang lugar.
Matud pa nga gikan sa nahitabuan sa krimen nahimo pa sa biktima nga mosakay ug motorsiklo dayon niuli sa ilang panimalay aron mqakapangayog tabang aron siya madala sa ospital.
Dugang pagbutyag ni Alias Inday nga basi sa pahayag sa biktima ngadto kaniya, gikan siya sa ilang balay nagbaktas padulong sa tindahan.
Gisabayan matud pa kini ug baktas sa suspek padulong sa tindahan apan pag-abot sa lugar siya gipusil sa nawong nga milapos sa iyang liog. Paspas usab nga misibat ang suspek sa wala sayring lugar samtang ang biktima nangayog tabang kaniya.
Dako ang pagtuo ni Alias inday nga posibleng kaila ra sa biktima ang suspek tungod kay nag estoryahanay pa sila samtang nagbaktas ayha nahitabo nag pagpamusil.
Dugang pahayag ni alias Inday nga nag inusara ra ang biktima sa ilang panimalay gumikan ang ginikanan niini tua nag puyo sa Litan Vill. Sinawal busy sa ilang negusyo sa isda.
Ang biktima ray nagpuyo sa ilang balay sa may Olarte Street gumikan mas duol matud pa kini sa iyang eskwelahan.
Samtang giklaro sa ginang nga usa man ka buotan ang biktima ug wala man kini problema sa ilang lugar, gani dawsa dili sila makatuo nga kini pusilon.
