General Santos City—Nagpabilin pa karon sulod sa kustodiya sa Philippine Drug Enforcement Agency (PDEA) Region 12, General Santos ang estudyante nga nakuhaan og ginadiling droga samtang anaa kini sulod sa Gensan City Airport og andam na kining musakay sa eroplano.
Matud pa kang PDEA-12 Director Valente Cariño ang naasoyng suspek ang giilang si Felixberto Perbillo VI alyas Moi-Moi, 21-anyos, nga residente sa Lower Osmeña, Koronadal City.
Dugang pa ni Dir. Cariño, nga padulong na unta sa Metro Manila si Perbillo kauban ang iyahang mga pamilya sa dihang nakadawat og taho ang PDEA 12 rason nga gihimo ang operasyon sa koordinasyon usab sa airport police og didto wala na makapalag pa ang suspek.
Gikumperma usab ni Director Cariño, nga una ng nakaikyas si Perbillo niadtong Disyembre 11 sa Koronadal City sa dihang gihimo sa PDEA 12 ang buy-bust operation kung asa nakuha sa posisyon niini ang tulo ka gramo sa gituohang shabu ingon man ang usa ka pakite sa gituohang pinaugang dahon sa marijuana.
Ang suspek ang mag atubang karon og kasong paglapas sa Republic Act (RA) 9165 o ang Comprehensive Dangerous Drugs Act of 2002. (Emir Bariquit)
