Gina-engganyo sang Land Regsitration Authority ukon LRA ang mga nagapanag-iya sang duta nga bayluhan na sang eTitle ang mga daan nga titulo.
Pinaagi sa ginhiwat nga roadshow sang LRA , ginabida sang ahensya ang mga pagbag-o sa ila serbisyo gamit ang moderno nga teknolohiya.
Ginpahayag ni Atty. Robert Nomar Leyretana, LRA Deputy Administrator nga lakip sa mga pagbag-o nga ginapabugal sang ahensya amo ang pag-upgrade sang mga manually-issued titles sa eTitles nga kabahin sang Land Titling Computerization Project (LTCP) sang ahensya.
Ginhatagan pagtamod ni Leyretana nga katuyuan sang eTitles nga masecure ang tanan nga paper documents ang may ara sa digital copies kon sa diin maamligan ang titulo batuk sa risgo sang pagkawat, pagkadula kag pagkaguba bangod sa natural kag man-made calamities kag maproteksyunan batuk sa mga luyag mag-peke sang titulo.
Agud makaavail sang eTitle, ginaengganyo sang LRA ang ila mga kliyente nga magdala sang kopya sang titulo kag iban pa nga dokumento kag magbayad sang balaydan nga gintalana sang ahensya.
Ginhiwat ang roadshow agud maengganyo ang mga bangko, real estate developers, LGU’s, kag GOCCs nga magpirma sang memorandum of agreement kaupod ang LRA agud lubos nga mapatuman ang mga mas ginpahapos kag mas masaligan nga proseso sa pagrehistro sang duta.
