TACLOBAN CITY – Nagpablotter ha Tacloban City Police Station 2 – Abucay hi Brgy. 91 Abucay Kapitan Recardo Benitez tungod nga naaapektuhan na daw hiya hini nga mga litrato nga ginsend ha social media account han iya asawa.
Mga litrato han babayi nga ginkastigo, an gin-aaligar nga nangastigo, hi Kapitan Benitez.
Exclusive nga nagpa-interview ha RMN hi Kap. Benitez, sumala ha iya, waray hiya may ginkastigo ngan waray daw ini kamatuuran.
“Nagpablotter ako kakulop kay waray ito kamatuuran. Ha akon sobra 20 anyos nga pagserbisyo hini nga barangay, waray ko pa may ginkuan [ginpasakitan] nga mga tawo… waray ko pa ngani bis ginkutol.”
Ha dugang nga salaysay ni Kap. Benitez, ginsaway la daw niya an babayi nga gin-aaligar ginkastigo.
“Ito nga babayi ginpabalhin ko la it hiya ha iba nga lingkuran kay nakadi ito hiya nalingkod ha may mga tuyo [nga nalingkod] nga lingkuran. Ginpabalhin ko hiya upod an alalay ni kagawad Inalisan kay adto it hira ha Barangay Hall mag-inukoy la waray man mga tuyo ngadto. Ito barangay opisina it hiya, diri istambayan,”
An gintatahapan ni Benitez nga nagpakalat han litrato ha social media an iya la mismo kagawad, hi Brgy. Kagawad Donabelle Inalisan pero dayon ini nga iginpanhimuwa han asawa ni Inalisan nga hi Reuben Aldaya.
Personal naman nga dumaop ha RMN an gin-aaligar ginkastigo ni kapitan nga hi Edna, sumala ha iya, ginyabo gud daw hiya ni Kapitan.
“Kinalitan ako hito niya [ni Kapitan], ginkupog an akon braso ngan ginmalmalan niya, iya ba ginyabo sugad hito.”
“Siring niya ha ak ‘gawas dinhi ha kay diri ka man dinhi kustomer’ ansya an iya siring ha ak.”
Nagpamedical hi Edna matapos an panhitabo dida han Agusto 22, nagawas ha medical nga “confluent bruise with slight swelling at left shoulder area.”
Pero siring ni Kapitan Benitez, damo iton magpapamatuod nga waray niya suntuka o kastiguha ini hi Edna.
