TACLOBAN CITY – “Tigdaay” la an nahinabo nga pagbabag-o hin ruta han mga Public Utility Vehicles (PUV’s) kakulop kun diin diri na makakaagi ha Caibaan road tipakadto ha New Bus Terminal ha Abucay an mga van, bus ngan jeep tikang ha mga bungto han Leyte.
Pero yana temporaryo nga ginsuspende han Tacloban City Government an nasabi nga ruta ngan paggamit han Tacloban Transport Terminal ha Marasbaras tungod han pagkukulang han information dissemination nga nagresulta han pagkawurok han mga drivers ngan commuters.
Ha Exclusive interview han RMN kan Tacloban City Govt. Executive Assistant Ronnie Cornico, naaro hira hin pasaylo ha publiko han ira sayop.
“Naaro gud kami hin pasaylo ha nahitabo nga nagkamali gud man an mga pagmando ha mga tawo.”
“Tungod nga may mga reklamo, naaro nala kami hin pasensya ha mga tawo. Gintutuhay naton ito, igbabalik naton ito hin maupay.”
Dugang ni Cornico, diri ada maupay an pag-inform han TOMECO ha mga drivers amu nga nawurok an pipira.
“Tungod siguro an mga TOMECO diri ada maupay an pag-inform ha ira kun kayano ginpwersa nira pagpaliko, dapat diri adto ginpapakuan [ginpepwersa] kay an aton ginhuhuna-huna an public welfare.”
Pati daw mismo mga Security Guard han Robinsons Place Tacloban ha Marasbaras in nawurok gihapon.
Aasikasuhon anay yana han Tacloban City Government an Information Dissemination para maupay an pagpasabot ha publiko.
Siring ni Cornico, matapos an usa tubtob duha kasemana in igbabalik nira pag-implementar hini nga bag-o nga ruta kun diin an mga sarakyan tikang ha mga bungto han Leyte in mayada na kalugaringon nga terminal ha Marasbaras ngan an New Bus Terminal ha Abucay naman in ig-aakomodar an mga sarakyan tikang ha Samar.
Rason naman daw liwat ini para maibanan iton pagbugiot han trapiko ha syudad ngan an mga illegal terminal ha Tacloban.
