EXCLUSIVE: Vice Mayor ha Samar, nangangaro hin hustisya ha pagkamatay han iya bugto ha Catbalogan

2555

TACLOBAN CITY – Naghahangyo hi San Sebastian, Samar Vice Mayor Mark Lester Lorenzo ha mga otoridad nga laksion an imbistigasyon para makuha nira an hustisya han pagkamatay han iya bugto.

“Ma fast track an investigation ngan magkamayada justice an akon bugto. Diri naman mababalik an kinabuhi han akon bugto, an amon la karuyag na makuha namon an justice.” – Ha exclusive interview han RMN kan Mark Lorenzo.

Ginpusil-patay hi PSSg. Kirk Walter Lorenzo ha sakob han iya panimalay ha Calachuchi St., Brgy. Muñoz, Catbalogan City, Samar kanina han alas 3:00 han kaagahon, April 11, 2019.

Ginsakob mismo an panimalay han biktima han diri pa makilal-an nga suspek ngan didto ginpusil an biktima samtang nakaturog ini ha sofa.

Sumala kan Vice Mayor Lorenzo, waray hiya nababaruan nga kaaway o death threats nga nakarawat han iya bugto.

“Waray hiya may nababanggit nga mayada hiya death threat or kaaway dida han magka-istorya kami.”

“Mahulat ako hit ighahatag nga copy report hit investigation han mga kapulisan.”

Ginkulba hi VM Lorenzo han mahiaram hiya nga ginpatay an iya bugto ilabi na nga releectionist hiya ha bungto han San Sebastian ha Samar.

Urhi nga nagka istorya hi VM Lorenzo ngan hi PSSg. Lorenzo dida han nakalabay nga semana.

Facebook Comments