General Santos City—swerting nabangalan sa usa ka Korean cargo Vessel ang usa ka mananagat nga si Marvin Airal, 23, anyos nga taga Barangay Tagen, Balut Island, Davao Occidental kansa duha ka adlaw nang nag-utaw-utaw sa kadagatan, 66 nautical miles ang gilay-on sa Southwest of Sarangani Island.
Sumala ni Marvin nga Domingo sa gabie dihang nanguha siya ug pusit uban sa iyang mga kaubanang mananagat sa kadagatang bahin sa Sarangani Occidental.
Apan naguba ang makina sa iyang bangkang de motor mao nga wala siya makauban sa iyang mga kaubanan nga mipadaplin sa lawod. Tungod niini nagpautaw-utaw nalang ang nahisgutan sa dagat hangtud nga nakaabot sa lugar asa sya nabangalan.
Samtang nagpautaw-utaw kini sa dagat, bugtong pagkaon niini ang bulad nga pusit. Alas 2:00 kagahapong adlawa dihang siya nabangalan sa MV HL IBT Korean Cargo Vessel nga pabalik na unta sa nasud Korea.
Gihatagan matud pa siya ug pagkaon, human niini nakig-alayon ang staff sa Korean Vessel ngadto sa Philippine Coastguard. Alas 12:00 ang takna sa kaganinang kaadlawon dihang gisugat sa Philippine Coastguard si Marvin ngadto nahimutangan sa Korean Vessel. Karong gabie, gikatakda sab nga muuli na sa Balot Island ang nasangpit nga mananagat.
