Daku ang nabulig sang Executve order 28 nga ginpaguwa ni Presidente Rodrigo Duterte sa pagnubo sang numero sang mga biktima sang palupok sa pagsug-alaw sang paskuwa kag bag-ong tuig.
Ini ang ginpahayag ni Supt. Rogen Morales, Deputy Director for operations sang Iloilo City Police Office.
Suno kay Morales nga nagapasalamat man siya sa kooperasyon sang mga pumuluyo para sa luwas kag matawhay nga pagselebrar sang bag-ong tuig.
Subong man, ginpahayag sini nga may pila gid ka mga tawo ang matig-a sang ulo kag naglapas sa nasambit nga kasuguan kon sa diin nagpalupok gid sang firecrackers sa indi designated area.
Gintumod sini ang apat ka nagkaladakpan sa lapaz kag arevalo sadtong disyembre 31 sang gab-i nga ginalakipan nanday Kagawad Ricky Paloa sang Alalasan, La paz; Jefferson Dela cruz sang Calaparan, Arevalo; Jemerson Clar sang Aguinaldo, La paz; kag si Jeffrey Guanco sang Villa anita, City proper nga nadakpan sa Luna, La paz.
