Atol sa pagpahigayon sa SP regular session sa syudad, nasayran nga dunay bag-ong na aprobahan nga bag-ong Environmental Compliance Certificate ang Del Monte Philippines adtong bulan sa Oktubre nga nag tugot sa pagpalapad sa plantasyon sa pipila ka mga barangay, nga sakop sa dakbayan sa Malaybalay partikular na sa Brgy. Miglamin ug Brgy. Silae diin mokabat sa 6,000 ka ektarya ang target niini nga expansion sa mga plantasyon sa dili madugay.
Sa pamahayag ni Charmaine Pailagao, sa Del Monte Philippines Agricultural Projects sa Malaybalay, gibutyag niini nga dili lamang pinya apan lakip na niini nga target ipananum sa dugang expansion niini ang kapayas ug abokado nga mga pananum.
Gituki kini sa konseho sa dakbayan sa Malaybalay sa kabalaka nga malakip sa target nga aplayan sa maong kompanya sa pagpananum ang mga protected areas sama sa mga source sa natural resources sama sa tubig nga posibling maka apikto sa mga lugar nga sakop sa dakbayan sa Malaybalay.
