Mandatory reporting sa mga Covid-19 cases sa mga hospital, gimando sa LGU-Valencia

Gimanduan karon sa lokal nga pangagamhanan sa dakbayan sa Valencia ang tanang mga balay tambalanan o mga hospital sa pag-report sa tanang mga matalang kaso sa sakit nga Covid-19.

Kini human nga niabut sa atensiyon sa LGU Valencia City, nga adunay pipila ka mga balay tambalanan ang wala na matud pa misunod o mi-report sa mga covid-19 cases.

Pinaagi sa Memorandum Order No. 387 series of 2022, kon ang Reiteration of Mandatory Reporting of Covid-19 Cases, gikinahanglan nga mag report ang mga health personnel ug mga health facilities sa mga kaso nga matala sa maong sakit isip pagsunod sa mandato sa Department of Health (DOH).

Tumong matud pa niini nga ma-obliga ang tanang mga health facility sa Valencia City sa pag-report sa mga matalang kaso sa Covid-19 aron nga masiguro ang monitoring ug ang medical evaluation sa dakbayan.

Gipirmahan ang maong kamanduan ni Valencia City Mayor Azucena P. Huervas pinitsahan Nobyembre 14, 2022.