General Santos City—Patay ang usa ka factory worker human kining gidunggab sa iyang kaubanan sa trabaho human nga nagbingkil gumikan sa kahubog sa may Purok Lower Acharon, Barangay Calumpang, Gensan ala 1:00 ang takna kaganinang kabuntagon.
Giila ang biktima nga si Jerome Villagonzalo, legal age, residenti sa Kiamba, Sarangani Province. Samtang ang suspek giilang si Steven Bulac, residenti sa Barangay Calumpang, Gensan.
Sa inisyal nga imbistigasyon sa kapulisan nasuta nga nag inum ang duruha sa 4 sister KTV bar, kabuntagon dihang midesisyon ang mga nasangpit nga muuli sa ilang gipuy-an apan pila ka metros ang gilay-on gikan sa maong KTV bar naglalis ang mga nasangpit nga misangko sa pagpanunggab.
Nakaangkon ug samad sa nagkandaiyang parti sa lawas ang biktima nga hinungdan sa iyang kamatayon. Samtang ang suspek mingsibat gilayon human sa gihimong krimen.
Sa karon ang suspek padayon pang gipangita sa kapulisan samtang ang biktima anaa na sa lokal nga punerarya dinhi sa dakbayan.
