BAGO CITY – Lubos nga ginasuportahan ni Mayor Nicholas Yulo sang Bago City ang farm mechanization matapos nga bisan sya mismo nakabatyag sang kakulang sang nga tinawo nga nagaobra sa kampo sang tubo kag humayan.
Isa sa ginalantaw nga rason ni Yulo amo ang pagsanyog sang kaalam sang mga bata sang mga farm workers, kun sang una tama na sa ila nga makabasa kag makasulat, subong madamo na sa ila ang highschool graduate kag college graduate nga nagaobra na sa syudad kag ang iban ara sa abroad.
Magluwas sina nagdamo pa ang trabaho sa construction nga makahatag sang sweldo nga P350 tobtob P400 ang adlaw kag inde ina masarangan sang mga mangunguma.
Dugang pa ni Yulo nga paagi sa makinarya mabuligan man ang mga mangunguma nga mapadasig ang trabaho kag diutay lang ang kinahanglan nga trabahador.
Mag luwas sina mas gamay ang kagastuhanan sang mangunguma kun matigayon na ini.
Tuyo sang gobyerno nga ang mga makinarya nga baklon kag ipanagtag sa mga cooperative nga amo naman ang mapadalagan sa kaumhan agud maka ambit naman ang mga mangunguma nga indi katapo sang kooperatiba.
Sa Barangay Binubuhan sa nagligad nga Pebrero 8 ginpangunahan ni Governor Alfredo Marañon, Jr. ang pagpanagtag sang mga high tech farm equipment sa pila ka mga cooperative matapos ginpatigayon ang demonstration sa demo farm sang Office of the Provincial Agriculture (OPA).
