GINBAWIAN na sang iya kabuhi si Fire Officer 3 Cornelio Silva kaina mga las kwatro sang kaagahon samtang ini ang yara sa Intensive Care Unit (ICU) recovery room sang Riverside Medical Center sa syudad sang Bacolod.
Sa pahayag ni Bureau of Fire Protection chief Inspector Publio Plotenia, si Silva ang chief arson investigator sang BFP sang syudad sang Bacolod kag supervisor sang Libertad Fire Station, ini ang magasaulog kuntani sang iya kaadlawan subong nga adlaw Enero 2 sa edad sini nga 55 anyos, apang ini ang nagtaliwan.
Kun madumduman, si Silva ang nag-angkon sang buno sa iya nga likod kag kilid matapos nga nagbun-anay sila ni Fire Officer 3 Isaac Cabanag nga assigned sa Granada Fire Station samtang nagpatigayon sang ila Christmas Party sadtong December 22 sang gab-i sa BFP compound sa San Juan Street, Barangay 8, Bacolod City. Samtang si F03 Cabanag ang ginbawian sang iya kabuhi matapos nga nag-angkon sang buno sa liog sadtong December 23 samtang ginabulong sa Regional Hospital.
Bangud sini, ginkasubo naman ni Fire Chief Insp. Plotenia ang pagtaliwan sang duha niya ka mga firemen bangud lunsay ini nga mga mapisan kag tampad sa ila nga serbisyo.
Samtang ginkumpermar naman ni Police Major Sherlock Gabana, Hepe sang Police Station 2 nga subong kuntani nga adlaw igapasaka nila ang kaso nga Homecide batuk kay FO3 Cornelio Silva apang ini ang napatay rasun nga posible serado na ang nasambit nga kaso.
[image: image.png]
