Davao City – Nagtoo si Barangay Captain Robert Itdang sa Salaysay, Marilog District nga adunay nagpabiling kakulangon ang Bureau Fire Protection (BFP) diha sa pagpatuman sa tanang mga safety protocol sa gitukod nga mga gambalay.
Matud ni Itdang, kun gipatuman lamang sa BFP ang safety protocol sa tanang istruktura, wala untay matigayon nga mga sunog dinhi sa dakbayan.
Nagduda ang kapitan nga gipaagi sa ‘under the table’ ang pagkuha og permit mao nga bisan og walay safety measures, makakuha sa gihapon og safety permit ang mga aplikante.
Una nang gisulti ni Senior Fire Offier 1 Ramil Gillado nga sagad sa tinubdan sa sunod-sunod nga sunog ning ulahing mga adlaw dinhi sa dakbayan mao ang electrical short circuit.
Gitinguha sa ilang barangay ang ‘zero fire incident’ busa aron makabat-ot ang maong tinguha, kanunay ang ilang pahimangno sa katawhan diha sa paglikay sa sunog, segun sa maong opisyal sa barangay Salaysay.
RadyoMaN Joel Viray
