HINIGARAN, NEGROS OCCIDENTAL – (2nd Update) Magadepende sa resulta sang imbestigasyon kon bala kaso nga murder ukon homicide ang igapasaka batuk security guard nga nakatiro patay sa isa ka miembro sang Bacolod City Police Office sang nagligad nga Sabado sa isa ka beach sa banwa sang Hinigaran.
Sa interview sang DYHB, ginpahayag ni HInigaran PNP chief, Police C/Insp. Jake Barila nga ginahulat pa sang iya talatapan ang resulta sang imbestigasyon kag kon ini ang maga-gwa na subong nga adlaw, gilayon nila nga igapasaka ang kaso.
Suno kay Barila nga may mga personalidad naman sa karon nga nagpahayag sang kahandaan nga mag-witness sa natabo.
Madumduman nga sadtong Sabado, pasado las 3 sang hapon sang natabo ang insidente kon diin natiruhan sang security guard sang Canonoy Beach Resort sa Brgy. Miranda nga si Joey Belenario, 39 anyos ang edad sang Brgy. Anahaw, Hinigaran ang biktima nga si PO2 Britches Talapiero.
Si Talapiero ang assigned sa BCPO – Station 5 sa Brgy. Granada kag pumuluyo sang Stone Heaven Subdivision ang amo man nga barangay.
Samtang, gilayon naman nag-surrender si Belenario, matapos niya sini natiruhan patay si Talapiero.
Base sa imbestigayon nga wala nag-insendihanay si Rutchy Talapiero, utod sang pulis, kag isa man ka kustomer sang resort nga si Leslie John Dojillo, 22, sang Sitio Linandan, Barangay Anahaw.
Bangud sini, nagpangayo sang bulig si Rutchy sa iya utod nga si Britches tubtob nga dumalagan si Leslie sa ila nga cottage kag didto na gintiro sang makaduha ka beses sa sang pulis, igo sa siko kag kibyas sa likod.
Sang nagresponde ang gwardya nga si Belenario kag tuyo nga magpacify, nakit-an si PO2 Talapiero sa guwa, kag hana pa siya nga tiruhon rasun nga iya ini gintiro una gamit ang iya shotgun.
Nagsungka si Belenario sa mga otoridad, bitbit ang iya shotgun kag pusil sang pulis.
Si Dojillo ang ara pa subong ginabulong sa Riverside Medical Center.
Ang bangkay naman ni Talapiero ang ara subong sa syudad sang La Carlota sa balay sang ila iloy.
Sa bahin naman sang mga kaupdanan ni Talapiero, nakanugunan sila bangod isa ka mabuot nga pulis ang ila upod.
Naka-half mast naman ang flag sang Bacolod Station No. 5 kag may gamay nga altar sa diin nakabutang ang litrato sang ila upod. /dyHB BACOLOD
