iFM Laoag – Naiget a namonitor dagiti landslide ken flood prone areas wenno dagiti luglugar a kangrunaan a maregreggaay ken malaylayos iti Sarrat, Ilocos Norte.
Daytoy ket kinumpirmaran ni Police Major Marlon S. Padamada, Chief of Police iti PNP Sarrat a baiente kuatro (24) oras ti panagmonitorda kadagiti nadakamat a luglugar, kangrunaanna iti Padsan River iti paset ti Brgy. San Manuel ken iti maysa a kalsada iti Brgy. San Isidro ti maysa a bantay.
Segun kenkuana, naiget a namonmonitor dagitoy agsipud ta iti tiempo ti panagtutudo ket saan a maliklikan dagitoy a pasamak.
Malaksid iti panagalerto dagiti kamkameng ti PNP Sarrat ket nagbalin pay a preparado ti Municipal Disaster Risk Reduction Management and Council (MDRRMC) a napan nangikayamukom dagiti nargaay a daga iti Brgy. San Isidro pakairamananna iti biang ti Department of Public Works and Highways (DPWH). [Joe Anne Agustin, RMN News]
