Davao City – Mas gipahugtan pa karon ang pag monitor sa mga pagkaon nga ginabaligya sulod ug gawas sa eskwelahan human nga na food poison sa gikaong bihon ang 5 ka manag-igsoon sa Sta. Cruz, Davao del Sur.
Sa pakighinabi sa DXDC RMN Davao kang Juventino Enriquez Jr., miyembro sa Committee on Health ug Bgy. Kagawad sa Astorga, Sta. Cruz, Davao del Sur, gibutyag niini nga ilaha nang gi-request sa Municipal Health Office nga hugot nga i-monitor ang mga ginabaligya sa eskwelahan dili lamang sa Federico Yap National High School asa napalit ang pagkaon apan bisan sa ubang mga tulunghaan.
Sa imbestigasyon, gipalit sumala pa ni Chris Marie Rosellosa, 13-anyos ang bihon udto niadtong Lunes, Enero 7, 2019 ug gikaon niini uban sa iyang igsoon pagkagabii, nga sila Bea, 10-anyos; Beato III, 7-anyos; Vina Jane, 6-anyos; ug Jason, 2-anyos. Diin pipila ka minuto, nagsuka-suka ug nanghilak na ang nahisgutan rason nga gidala kini sa ilang mga silingan ngadto sa ospital.
Matud pa sa Enriquez, nga posible nga nadaut na ang pagkaon labi na nga alas-12 sa udto pa kini napalit ug gabii na kini nakaon diin gibalot usab kini sa cellophane.
Sa karon, anaa sa luwas nga kahimtang ang mga biktima diin sigun sa opisyal nga gikatakdang magpahigayon og assembly meeting ang eskwelahan uban ang mga ginikanan ug mga stakeholders aron dili na masubli pa ang maong insidente.
RadyoMaN Kirby Manzon
