Davao City – Gipatuman karon sa municipal government sa Magsaysay sa Davao del Sur ang forced evacuation tungod sa risgo nga posibleng mag-landslide sa lugar.
Subay sa Executive Order No. 72 ni Magsaysay Mayor Arthur Davin, istriktong ipatuman ang force evacuation sa dihang nadiskobrehan sa mga eksperto gikan sa Mines Geosciences Bureau ug Phivolcs na dili mamahimong puy-an ang mga lugar nga apektado sa linog diin nadiskobrehan ang mga dagkong liki sa yuta nga posibleng mahugno oras nga magbaton og kusog nga mga pag-ulan.
70 ka mga pamilya gikan sa Sitio Labidangan sa Barangay Upper Bala ug 78 ka mga pamilya sa Malawanit, Magsaysay ang gipahiklin sa mas luwas nga lugar.
Gisiguro usab ni Anthony Allada, Information Officer sa Magsaysay nga tabangan sa lokal nga panggamhanan ang mga apektadong pamilya.
Kahinumduman nga gipailawom sa state of calamity ang Magsaysay sa dihang natala ang P200M nga damyos human ang 6.3 magnitude nga linog.
RadyoMaN Kirby Manzon
