GIUSWAG ngadto sa katapusang adlaw sa ting-trabaho sa bulan sa Abril ang gitakda nga pagbayad sa franchise tax gikan sa naandan nga unang beynte ka adlaw sa bulan sa Enero, subay sa na-aprobahang Ordinansa Numero 2020-038R(26th SP) nga gi-ulohan ug “An Ordinance Adjusting the Period of Payment of Franchise Tax from the first twenty days of January to on or before the last working day of April, Amending for the purpose Article 2.G, Section 2.G.03 of Ordinance No. 2013-004R(12th SP) otherwise known as the Provincial Revenue Code of Bukidnon”.
Kini human na-obserbahan ni Provincial Treasurer Marilou S. Bueno nga rason sa franchise tax payers nga dili sila makabayad sa tukma nga tingbayad sa bulan sa Enero kaniadto gumikan daghan sa mga gikinahanglang rekisitos ang angayang ilakip diha sa pagbayad sama sa audited financial statements, rason nga gi-uswag ang pagbayad aron kahatagan sila sa igong panahon nga i-andam kini.
Subay sa Provincial Revenue Code sa Bukidnon, ang franchise tax adunay bulohisan nga 50% sa 1% sa gross annual receipts nga naglakip sa cash sales ug sales on account nga kita gikan sa niagi nga tuig.
Gipahimangno ni Ms. Bueno nga bayran gayud sa tukmang panahon ang franchise tax aron kalikayan ang mosunod nga mga multa: surcharge (dugang bayad) nga 25% sa orihinal nga kantidad; interest (interes) nga 2% kada bulan gikan sa due date hangtud nga ang bulohisan hingpit mabayran apan dili molapas sa 36 ka bulan; penalty (silot) nga kung si kinsa man ang makalapas niini, magbayad sa ₱1,000 or more than ₱5,000 o pagkapriso nga dili moubos sa usa ka bulan apan dili molapas sa unom ka bulan o ba kaha ang duruha depende sa desisyon sa korte.
