Indi pa mag-epektibo subong nga tuig ang P50.00 nga saka sa balayran sa ginapatigayon nga rabies vaccination sang Provincial Veterinary Office sang South Cotabato.
Ini matapos nga base sa amended revenue code sang probinsya Abril 1 mag-epektibo kuntani ang pagpasaka sa balayran sang rabies vaccination sang talatapan halin sa ginasukot nga P10.00.
Suno kay Dra. Flora Bigot, OIC Provincial Veterinarian ini tungod nakabaton sang supply sang anti-rabies vaccine ang probinsya halin sa Bureau of Animal Industry kag bastante ini tubtob magtakop ang tuig.
May-angot sini, suno kay Dra. Bigot tubtob matapos ang tuig libre ang ginapatigayon nila nga rabies vaccination sa mga kabanwahanan kag bisan ang mga nagapabakuna sang ido sa ila nga opisina.
Samtang sa tion nga magapadayon ang paghatag sang supply sang anti-rabies vaccine sang Bureau of Animal Industry mangin libre suno pa ang rabies vaccination sang talatapan.
Nahibaluan nga target sang national government nga sa tuig 2020 mangin rabies free ang bug-os nga pungsod.
