Kooperasyon sang tanan ang hingyo sang isa ka frontliner sa ciudad sang Bacolod sa tunga sang COVID-19 pandemic.
Si Police Chief Master Sergeant Raphael Palacios nga assigned karun sa border check-up point sang Brgy. Sum-ag kag ciudad sang Bago, ang aminado nga may yara sa gihapon sang mga nagapasaway sa checkpoints kag wala nagasunod sa quarantine measures nga ginapatuman sang gobyerno, gani nagahingyo ini sa tanan nga magsunod sa mando sang gobyerno agud matapos na ang krisis.
Bangud sang iya obligasyon nga nagabantay sa border kag dako man ang risgo sini nga malatnan sang virus, ginabawalan ini anay sang iya asawa nga isa ka doktor nga magpauli sa ila duha ka bata sa Brgy. Ara-al, La Carlota City.Ang doktor nga asawa ni Palacios ang pareho man niya nga frontliner kag sila ang may duha ka bata nga babaye nga naga-edad sang tatlo kag siyam katuig.
Apisar sang iya obligasyon, nagapangibabaw sa gihapon ang pagkaamay ni Palacios, bangud bisan pa nga ginadumilian siya sang iya asawa nga magpauli anay, naglisensiya gid ini sa iya hepe agud masurpresa ang iya 3-anyos nga bata sa iya nga birthday sang Abril 20.
Suno kay Palacios, nag-istoryahanay sila sang iya asawa nga indi lang siya magpalapit sa ila kabataan, apang naghibi na ang magulang gani nga nangita na lang sila sang plastic agud putson ang ila lawas kag iya mahakos.
Sa karun, nagahingyo lamang si Palacios sa tanan nga pumuluyo nga mag-kooperar sa mga regulasyon sang gobyerno, bangud may katapusan man ang ini nga krisis.
[image: image.png]
