Mangin sentro sa selebrasyon sang ika-64 nga anibersaryo kag 8th Agten Tufi Festival sang banwa sang Tupi ang “fruits eat all you can” ukon posible mangin “fruits bring all you can” kon tuman gid kadamo suno pa.
Ipatigayon ang nasambit nga aktibidad sa opening salvo kag sa pagtakop sang selebrasyon sa Setyembre 11 subong nga tuig.
Suno kay Tupi Mayor Reynaldo Tamayo luyag nila nga tutukan ang nasambit nga aktibidad tungod gusto sini ipakita nga fruit and vegetable basket sang probinsya sang South Cotabato ang banwa sang Tupi.
Ipakita man nila suno kay Mayor Tamayo paagi sa nasambit nga aktibidad nga panahon na agud nga maistablisar ang bagsakan center sa Tupi tungod sa kadamuon sang prutas kag utanon halin sa banwa nga otsyenta porsyento ang nagapadulong lang suno pa sa bagsakan sang General Santos City.
May-angot sini posible sa masunod nga tuig maistablisar na ang bagsakan center sa banwa suno sa alkalde tungod sayang man nga sa General Santos City nagapadulong ang arkabala nga kuntani sa probinsya partikular na sa banwa sang Tupi magakadto.
Samtang hugot naman ang ginapatuman nga seguridad sa banwa suno kay Police Chief Inspector Rey Egos Chief of Police sang Tupi Pnp tungod sa selebrasyon sang 64th Anniversarry kag 8th Agten Tufi Festival.
