NOTORIOUS NA SUSPEK SA PICKPOCKETING NADAKPAN NAN PNP SA BRGY. WASHINGTON, SURIGAO CITY Tagkilaya an suspek na si Richard Traya Sumalinog, 24 anyos, wayay trabaho, residente sa Purok 2, Brgy. Mahayahay, Kitcharao, Agusan del Norte. Ini na suspek an nag-atubang nan kasong Theft ug may taglatid na bailbond kantidad P20,000 na naunang tag-isyu ni Judge Catalina Shineta Tare-Palacio nan Regional Trial Court Branch 32. Si Sumalinog an suspek sa sunod-sunod na kaso sa pickpocketing diri sa siyudad, Nadakpan ini ganinang alas 8:30 sa buntag sa dayan Rizal, Brgy. Washington atubangan nan Caraga Regional Hospital pinaagi sa nakadakop na si SP01 Romelito Sanchez nan Theft and Robbery Unit sa City PNP. An kaibanang suspek ug maguyang niini na si Roger Sumalinog an nakaikyas ug padajon na taghanap nan mga otoridad. An modus operandi nan mga suspek an mosakay nan tricycle ug multicab, target an mga pasahero sa pagpangawat na kon diin an gamit sa pagsalipod sa ila mga kamot an kolor gray na packbag.
