Patay si Bevino Laride ug kaipong si Virginia Delibo, lakip na ang ilang lima ka bulang anak human kini maigo sa nahitabong sinukliay sa bala niadtong Lunes sa kadlawon sa ilang pinuy-anan sa Purok-6, Brgy. Taguranao, Tubod, Lanao del Norte.
Nasayran nga mohimo unta sa pagsilbi sa warrant of arrest ang hiniusang pwersa sa Police Public Safety Company ug SWAT team sa Lanao del Norte, ngadto ni Bevino Laride alyas Jun-jun tungod sa kasong Frustrated Murder ug kang Jonel Laride alang sa kasong Attempted Murder, dihang kalit nga gipabothan ni Bevino sa iyang armas ang mga otoridad.
Tungod niini, napugos sa pagsukol ang kapolisan ilabina nga napusilan niadtong higayona ang lead scout sa SWAT nga si PO1 Yasser Macatbar, hinungdang nahitabo ang engkwentro.
Apan walay swerte, napusilan patay atol sa engkwentro si Bevino lakip na ang kaipon ug ang lima ka bulan niining anak.
Wala usab malakip sa panghitabo ang laing suspek nga si Jonel tungod kay wala kini sa panimalay ni Bevino, dihang isilbi unta sa kapolisan ang warrant of arrest ug sa pagkahitabo sa pinusilay.
Tungod niini, gidala sa provincial hospital sa Baroy, Lanao del Norte ang napusilang si PO1 Macatbar kinsa gibalhin ra usab sa Mercy Hospital sa Iligan City aron mas maatiman ang naangkon niining samad pinusilan.
Human sa insidente, gidala ang napatay nga pamilya sa Sanctuary Funeral Homes alang sa paraffin testing ug sa pagpahilona sa mga biktima.
Nakuha usab sa kapolisan sa pinuy-anan sa mga Laride ang M2 carbine rifle nga adunay usa ka steel magazine nga loades sa pito ka cartridges nga maoy gigamit sa napatay nga si Bevino ug walo ka fired cartridges case nga gituhoang bala sa carbine ug usa ka kalibre nga .22 rifle.
Sa karon gikustodiya na sa Scene of the Crime Opertatives kon SOCO sa Lanao del Norte ang maong mga butang, samtang padayong gipangita ang laing wanted person nga si Jonel.
By: Kasamang Ellah Baculio
PC: PNP 10
