Nakuryente ang duha ka mga lalaki matapos nga naghukas ang mga ini sang tubo sang antenna nga nagaangot sa internet.
Ang mga biktima ginkilala kay Jiboy Sordilla, 32 anyos, may asawa kag nagatrabaho bilang private computer technician kag pumuluyo sang Purok Nava, Brgy. 3, Pontevedra.
Samtang ang iya upod naman amo si Johnny Gegantoni, 32 anyos, soltero kag pumuluyo sang Purok Kapayas, Brgy. Miranda, Pontevedra.
Basi sa pahayag ni PSI Ryan Salazar, hepe sang Pontevedra PNP, nga alas 11:05 kaina sang udto, nakabaton sila sang tawag gikan kay Raymar Deocaden sang Purok Kapayas, Barangay Miranda kag gilayon ini nga ginrespondihan nila.
Basi sa initial nga inbestigasyon, nga si Sordilla, nagpabulig hukas sang tubo nga haligi sang antenna nga nagaangot sa Internet apang natumba ini kag nagtupa sa main line sang Noceco kabangdanan sang ila nga pagkakuryente ni Gegantoni.
Gindala pa ang duha sa Valladolid District Hospital apang gindeklara nga dead-on-arrival ni Dr. Mike Samson, ang attending physician.
