BACOLOD CITY – Hugot na ginapanginwala sang isa ka lalaki nga nakilala lang kay Alias Putot, naga-serbe “guarantor” sa pautang nga may kahilabtanan ini sa natabo nga hold-up kahapon sang hapon sa Brgy. Vista Alegre, Bacolod City.
Ini kasunod nga ang biktima nga si Elisa Bello, 52 anyos ang edad, pumuluyo sang Had. Garcia, Brgy. Vista Alegre ang ginhold-up sang duha ka mga suspek may mga la una kahapon sang hapon sa amo man nga lugar kag nakuha sa iya ang ginadala sini nga cash nga kapin 215 mil pesos.
Nahibaluan nga si Elisa ang nagapautang sang kwarta kag si Alias Putot amo ang guarantor sa ginakuhaan niya sang kwarta para ipautang.
Suno kay PSInsp. Ramel Sarona sang Station 7 nga kon ngaa ginpatawag si Alias Putot agud pamangkuton amo bangud nga siya gid lamang ang nakahibalo nga may bitbit nga kwarta si Elisa bangud nga magkaupod sila sang gin-releasan sang kwarta ang biktima.
Kahapon, isahanon nga naglakat ang biktima bitbit ang amo kadaku nga kwarta kag sang ini ang naglabay sa kampo, hinali na lamang nga ginbanggaan sang duha ka suspek kag ginlampusan ini sang bato.
May igo sa iya agtang kag ulo si Elisa gani ini ang natumba, nadulaan sang animo kag nakita na lamang sang pila ka nagalabay nga amo ang nagbulig sa iya agud madala sa ospital.
Samtang, natigayon naman nga ma-dagit sang mga suspek ang P215,000 pesos nga kwarta sang biktma.
Sa karon padayon nga ginabulong sa Corazon Locsin Montelibano Memorial Regional Hospital ang biktima./dyHB BACOLOD
