General Santos City—Nagpadayon pa ang gihimong imbistigasyon sa Police Station 4 sa nahitabong pagpanulis sa wala pa mailhing mga suspetsado sa gasolinahan partikular na ang Flying V nga nahimutang sa may NLSA Road, sakop sa Purok Bayanihan, Barangay San Isidro, Gensan ala 1:00 pasado ang takna kaganinang kaadlawon.
Base sa blotter report sa Police Station 4, midangop sa ilang buhatan ang mga biktimang si Fadilah Minabari, legal age, trabahante sa maong gasolinahan aron isumbong ang pagpanulis sa wala mailhing mga suspek.
Saysay sa biktima nga nagpagasolina matud pa ang duha ka mga suspetsadong sakay sa usa ka Bajaj nga motorsiklo nga adunay plaka numero nga LC-75301, samtang ang kaubanan sa mga nasampit nga sakay sa usa ka XRM nga motorsiklo ang naghuwat lang sa dalan.
Human ug pagasolina, ihatod na unta sa biktima ang bayad sa mga nasampit ngadto sa cashier room apan siya gisundan sa suspek dungan sa pagbunlot ug pusil dayon mideklara ug tulis.
Gigapos gilayon sa mga suspek ang kamot ni Minabari apil na sa kaubanan niining si Jorelyn Carillo dayon gikuha ang ilang mga Cellphone ug halin nga mukabat sa P4, 000.00.
Ayha nibiya ang mga suspek ila pang gipahimangnuan ang mga biktima nga kung musumbong, sila balikan sa mga nahisgutan.
Basi sa paghulagway sa biktima sa suspek, pulos nakasul-ob matud pa ug jacket ug naka-facemask ang mga nasampit. Sa karon nag padayon pa ang gihimong imbistigasyon sa kapulisan kalabutan sa maong insidenti.
