General Santos City—Gibaharan karon ni Police Chief Superintendent Marcelo Morales, Regional Director sa Police Regional Office-12 ang mga pulis nga naga dawatan ug SOP sa mga check point aron nga maka lusot ang iligal nga mga kontrabando.
Panghimangno sa Opisyal sa kapulisan sa Rehiyon 12 nga nagahimo sa ingon nga undangan na kini tungod higayon nga iya kining madakpan, aduna syay silot nga ipahamtang.
Gihingusgan ni Gen. Morales nga pinakauna nga maapektohan niini mao ang Chief Of Police sa mga police nga nagadawatan ug SOP sa check point tungod kay gipasagdan niini ang iyahang mga sakop.
Samtang pinaka-mubo matud pa nga silot sa maong binuhatan mao ang pag kasuspende sa serbisyo, samtang mamahimo sab kining ma-demote. Samtang pinakabug-at nga silot niini mao ang pagkatanggal sa serbisyo.
Busa nanawagan si Gen. Morales ngadto sa katawhan nga higayon nga dunay pulis nga mangutong diha sa Check Point o magdawat ug SOP, isumbong gilayon sa iyang buhatan aron nga iyang maaksyonan.(Dave Silagan)
