General Santos City—Sugod karong adlawa Mayo 30, anaa na ilawom sa Modified General Community Quarantine (MGCQ) ang dakbayan sa Gensan. Tungod niini wala nay ipatuman nga clustering, sunday lockdown ug wala na usab ipatuman nga curfew para sa 22 anyos pataas.
Sumala kang Gensan City Mayor Ronnel Rivera, dili na kinahanglan pa ug Quarantine Pass kung mugawas ug balay apan dapat gihapon nga magsul-ob ug face mask.
Tugutan na usab ang pag-abli sa ubang mga establishemento sama sa sinehan, beach resort, gym, ug uban pa apan kinahanglan nga mag-obserba gihapon ug physical distancing.
Lakip sa mga gitugutan ilalom sa MGCQ mao ang pag-abli sa mga simbahan, internet cafe apan dapat gihapon nga ipatuman ang physical distancing.
Magpadayon gihapon ang paghatag ug ayuda ngadto sa mga apektado sa covid-19 hilabina nga wala pa sa recovery stage ang dakbayan ug anaa pa lang sa response stage.
Samtang sa mga byahe sa bus sulod sa Rehiyon 12, kini ang magdepende pa sa direktibang ipakanaog sa Department Of Transportation.(LVR)
