Davao City – Gumikan sa nabyaang gidauban nga mga sagbot, nasunog ang usa ka balay sa San Roque, Daliao Toril, Davao City kaganinang alas 2:10 sa hapon.
Sa pakighinabi sa DXDC RMN Davao sa imbestigador sa maong sunog nga si FO3 Norman Francis Moratin sa Toril fire station, nakaangkon og 1st degree burn sa agtang ang tag-iya sa balay nga giilang si Roberto Cabiling.
Sumala ni Moratin, midako ang kalayo sa gidauban nga mga tinapok nga sagbot ug uban pang basura hinungdan nga misulod ang kalayo sa maong balay nga gama sa light materials.
Matud pa gibana-banaang mokabat sa 225,000 pesos ang damyos sa maong sunog diin gideklara kining fire out sa kabomberohan alas 2:53 sa hapon.
Pahimangno niini ngadto sa katawhan nga dili byaan ang mga gihaling o gidauban aron malikay sa sunog.
“Kung naay sagbot, avoid burning of waste materials ug garbage kay naa tay clean air act of 1990 nga ginabawal ang pagsugnod tungod makadaot kini sa hangin. Provide good housekeeping, kung manghinlo dapat proper disposal ug dili sunugon kay this month ginakonsider baya nga hottest month unya kung maghaling, bantayan gyud ug be responsible kay kung di mabantayan tungod sa kainit pud sa panahon, dali ang pagkalat, musiga dayon ug mag-cause og dako nga sunog,” sigun ni Moratin.
RadyoMaN Renz Barbarona
