Gigikanan sa virus nga nakuha sa lolo nga nagpositibo sa Sarangani, ginasuta pa

34

Sarangani Province–Ginasuta na karon sa Sarangani Integrated Provincial Health Office kung asa nakuha sa 70 anyos nga lolo nga taga Maitum, Sarangani Province ang covid-19 human nga nagpositibo kini sa gipahigayon nga Swab Test sa coronavirus.

Sumala pa ni Dr. Arvin Alejandro ang labaw sa Provincial Health Office-Sarangani nga basi sa ilang pagsuta walay travel history ang maong pasyente sa mga lugar nga adunay positive case sa covid-19. Gikumperma usab ni Dr. Alejandro nga daan nang may sakit sa iyang baga ug naga-pailawom kini sa treatment sa iyang balatian.


Mayo 4, unang gidala ang 70 anyos nga lolo sa Maitum Municipal Hospital human naglisod ug ginhawa, pagkaugma, gidala kini sa Sarangani Provincial Hospital ug gipailawom sa Person Under Investigation.

Sa karon nagapahigayon na ug contact tracing ang IATF-Sarangani sa mga direct contact sa maong pasyente samtang nakig-alayon na sila sa Provincial Health Office sa South Cotabato aron nga ipailawom sa swab test ang anak niini nga taga Barangay Ned, Lake Sebu kansa usa sa may direct contact ngadto sa pasyente.

Sa karon anaa na sa stable nga kahimtang ang pasyente kansa padayong gi-atiman sa COVID facility sa probinsya.(CDS)

Facebook Comments