General Santos City—Hingpit nang napasakaan ug kaso ang lalaking gihimong tulay sa sextortion atol sa gihimong entrapment operation sa Polomolok Municipal Police Station sa nakalabayng adlaw.
Giila ni Police Chief Inspector Alex Joe Orcajada, Hepe sa Polomolok PNP ang suspek nga si Paul Michael Sagalungas, residenti sa 4rth Road, Barangay Cannery Site, Polomolok, South Cotabato.
Nasayran nga una nang mireklamo sa buhatan sa Polomolok PNP ang usa ka 19 anyos nga dalaga nga taga Gensan human matud pa kining gibaharan sa usa ka nagpailang Parker nga higala matud pa niini sa facebook nga i-upload sa social media ang mga sex videos sa biktima.
Tungod niini nabalaka ang nasangpit mao nga mireport sa kapulisan. Didto na gihimo ang entrapment operation sa Municipal Plaza sa Polomolok, kansa maoy nasabutan sa biktima ug sa suspetsado.
Dihang miduol na si Salagungas sa biktima didto na gisikop sa kapulisan ang suspek apan nasuta nga dili diay kadto maoy main suspek inay alalay lang sa suspetsado kansa nakasibat human nasayran nga gidakop ang iyang kauban.
Dugang pagbutyag ni Orcajada nga nakuhaan ug usa ka sachet sa gituohang shabu si Salagungas dihang kini gikapkapan sa kapulisan. Tungod niini pasakaan ug kasong kalapasan sa RA 9165 ang nasangpit nga suspetsado.
