General Santos City—malampusong narekober ang gi-carnap nga sakyanan sa Barangay North Gensan, Gabie niadtong Disyembre 31, 2017 nga gipanag-iyahan sa usa ka Barsis Luma Taya, 41, empleyado sa LGU Palimbang, Sultan Kudarat ug residenti sa samang lungsod.
Una nang gikawat ang sakyanan sa biktima samtang kini anaa sa Nonoy carwash nga nahimutang sa Barangay North ning dakbayan nga gipanag-iyahan ni Alfonzo Basco Jr., 38, nga taga Roca Subd., Barangay Apopong ning syudad.
Suspek sa pagdagit niini ang empleyado sa maong carwash nga si Jade Masunong, 18 nga taga Barangay Pinalpalan, Malita Davao Occidental. Gikabutyag nga uwahi na namatikdan sa mga personahe sa carwash ang pagsibat sa suspek dala ang usa ka Toyota Pick-up nga may temporary Plate no. 1201135701.
Sumala ni Police Sr. Inspector Reynaldo De Armas nga alas 9:00 ang takna sa gabie kahagapong adlawa dihang narekober ang maong sakyanan sa Sta Maria, Davao del Sur Public terminal human giabanduna sa suspek. Nakarekober niini ang manager sa Car Wash nga si Eduardo Maulana human iyang gisuwayan ug pangita ang suspek didto sa ilang lugar.
Basi sa gihimong pag imbistiga nabangga sa suspek ang maong sakyanan mao nga iya nalang gibilin didto sa maong lugar. Gikaingong ayha nahitabo ang pagpangarnap, namatikdan nang daan sa mga kaubanan sa suspek nga dili mahimutang ang suspetsado.
