General Santos City—Patay human misukol ang usa ka gikaingong high value target sa illegal drugs nga si Taogan Usman Vicente, 38 anyos, Vendor, nga taga Barangay Sadsalan, Lambayong, Sultan Kudarat atol sa gihimong buy-bust operation sa hiniusang pwersa sa RPDEU-12, Polomolok MPS, RID-12, SPPO sa pakig-alayon sa PDEA -12 alas 8:30 ang takna sa kabuntagon, kagahapong adlawa.
Sa report nga nakuha sa DXMD RMN Gensan News Team sa Polomolok MPS nasuta nga mikagat sa buy-bust operation ang suspek nga gipahigayon sa may Purok 2, Barangay Crossing Palkan, Pomolok diin napalitan kini ug usa ka sachet sa gituohang shabu.
Apan nakamatikod ang suspek nga Police ang iyang nakatransaksyon maong nibunlot kini ug pusil dayon pabuto apan nakabalos dayon ang tropa sa kapulisan diin napusilan ang suspek.
Gidala pa kini sa Polomolok Municipal Hospital apan gideklara kining dead on arrival.
Malampuson usab nga nakasibat ang kaubanan sa suspek kansa maoy nagmaniho sa gisakyan nilang motorsiklo.
Narekober sa mga taga SOCO ang usa ka unit sa cal. 38 nga pusil, upat ka buhing bala, tulo ka FCC sa 9mm; usa ka camouflage nga sling bag nga adunay unod nga P1,000.00; usa ka unit sa cellphone; usa ka coin purse nga may sulod nga upat ka medium size sachet sa gituohang shabu; siyam ka small size sachet sa gituohang shabu nga gibana-banaang anaa sa kinatibuk-ang kantidad nga P80,000.00, ug mga drug paraphernalia.
Ang suspek ang gikaingong number two sa PRO-12 recalibrated top 10 illegal Drug Personalities ug apil usab kini sa target list sa PDEA-12.
