NEGROS ORIENTAL – Gin-ako sang New People’s Army – NPA ang pagpatay sa mag-utod nga sanday Dominador kag Nelson Quilanan sang Sitio Uyangan, Brgy. Budlasan, Canlaon City sadtong nagligad nga Marso 7, 2018 las 8 sang aga.
Sa press release nga ginpadala sang Leonardo Panaligan Command sang NPA Central Negros Guerilla Front pinaagi sa spokesperson sini nga si Ka JB Regalado nga ginpatuman ang silot sa duha matapos napamatud-an kag napamatbatan sang Rebolusyonaryong Korte sang Pumuluyo ( People’s Court ) nga ini sila ang may kaso nga pagpatay, pagpang-into sa mga pumuluyo kag masupog nga ahente sang military.
Nagadayaw man ang LPC sa mga isganan nga yunit sang NPA sa paghatag sang nagakaigo nga hustisya sa mga biktima nanday Nelson kag Dominador Quilanan kag pagkumpiska sang 1 ka handset kag cellphone nga may angot sa AFP.
Suno sa NPA, si Dominador Quilanan isa ka job-order personnel sang siyudad sang Canlaon City bilang Hepe sang Barangay Green Brigade (BGB) diin madamo sang nabiktima nga kasubong niya nga mga katapo sang BGB.
Pahayag pa sang LPC nga masami nagadispalko sang sweldo sang mga kaangay niya nga BGB si Dominador paagi sa paglansi nga wala pa sang sweldo pero ang matuod iya na nakuha ang tanan nga mga sweldo sang mga ini.
Siling ni Ka JB, halos naga-antus sa kagutom ang pamilya sang mga biktima tungod nahadlok na magreklamo sa iya./dyHB BACOLOD
