General Santos City—Patay ang usa ka ginang human nga gipusil sa wala mailhing suspek samtang kini nanglaba didto sa ilang panimalay sa may Purok Green Meadow Extension, Barangay Tambler, Gensan alas 8:30 ang takna sa buntag.
Biktima giilang si Cykie Acebedo, 38, residenti sa samang lugar.
Subay sa report sa Police Station 5 nasuta nga samtang naglaba ang biktima, usa ka lalaki nga nakamotorsiklo ang niabot tungod sa ilang balay.
Wala nay sulti-sulti gipusil niini ang ginang igo sa iyang ulo nga bahin nga miresulta sa iyang hinanaling kamatayon.
Paspas nga misibat ang mga suspek sa wala sayring direksyon, samtang ang biktima wala na nadala pa sa hospital human nga gibakwian ug hinulamang kinabuhi.
Sa pagpanubay sa kapulisan, nasuta nga ayha pa nahitabo ang pagpatay sa biktima, ang live-in partner niini ang nahimong suspek sa pagpanunggab nga nahitabo sa AOR sa Police Station 7 usa na simana na ang nakalabay.
Sa karon nagpadayon ang gihimong imbistigasyon sa kapulisan kalabutan sa insidenti.
