Davao City – Kritikal ang usa ka ginang sulod sa Southern Philippines Medical Center (SPMC) human nadasmagan sa naghaguros sa Kilometer 13 Panacan ning siyudad alas 12:30 sa kagabhion.
Nakahiagom og mga pangos sa kalawasan si Marissa Empaces, 39 anyos, minyo ug nanimuyo sa Lizada Toril kinsa daling gidala sa Medic Team sa Central 911 sa SPMC ang biktima.
Naangol sab ang laing biktima nga si Ruel Toriales, 40 anyos, residente sa dalang Artiaga ning dakbayan human nakaangkon og pangos sa lawas ug nadala sab sa mao nga ospital.
Sa imbestigasyon ni SPO1 Castillo sa Traffic Section sa Sasa PNP nga paingon unta sa North bound area ang SUV nga gimanehoan ni Julian Paccal Jr., 60 anyos, gikan sa South bound area.
Apan pag-abot sa mao nga lugar wala maalinggati sa driver ang pagtabok sa duha resulta nabanggaan ang duha hinungdan sa ilang naangkon nga mga pangos.
Daling nakaresponde ang Medic Team sa central sa lugar ug dayon gisapupo ang duha paingon sa SPMC.
Temporaryo gi-detinar ang driver sa Sasa PNP samtang gihikay na ang ipasang-at nga kasong Reckless Imprudence resulting to Physical Injuries batok ni Paccal.
RadyoMaN Joel Viray
