General Santos City—Dakpan sa Operatiba sa Police Station 4 ang usa ka 64 anyos nga babaye nga adunay warrant of arrest atol sa ilang gihimong operasyon sa Purok Udagre, Barangay Conel, Gensan alas 2:20 ang takna sa hapon, kagahapong adlawa.
Ang dinakpan giilang si Alias Euphemia, 64, minyo ug residenti sa maong lugar. Nasikop ang nasangpit pinasikad sa warrant of arrest sa kasong kalapasan sa Sec. 1, Par (A) sa P.D 1602 (Illegal Gambling) nga may criminal case no. 53778-1 nga una nang gipagula ni Hon. Presiding Judge Marie Ellengrid Baliguat sa MTCC 11th Judicial Region Branch 1.
Wala na makapalag ang ginang human nga gipresentar ngadto kanila ang warrant of arrest sa kasong iyang giatubang.
Sa karon ang nasangpit balhog na sa silda sa Police Station 4 samtang gihuwat nalang ang commitment order niini aron nga siya mabalhin na sa Gensan City Reformatory Center, apan mamahimo niining maangkon ang temporaryong kagawasan higayon nga kini makapyansa ug P12,000.00.
