NEGROS OCCIDENTAL – Gilayon nga gin inquest ang kaso nga rebellion in relation sa Republic Act 10591 ukon illegal possession of firearms sa Provincial Prosecutor’s Office batuk sa ginaalegar katapo sang New People’s Army ukon amasona nga naka enkwentro sang Special Action Force sa boundary sang Brgy. Manlocajoc, Sipalay City kag Brgy. Gatuslao sa banwa sang Candoni kahapon.
Narecover sa gina-alegar amasona nga ginkilala kay Mercideta Villanida, 57 anyos kag pomoloyu sa Brgy. Gatuslao, banwa sang Candoni, ang isa baby armalite rifle kag mga gina-alegar kagamitan sang mga rebelde.
Sa nahibalu-an napilasan sa amo nga engkwentro si Police Insp. Jose Buscato matapos nga naigo ang iya wala nga li-og kag yara sa subong sa isa ka ospital diri sa Bacolod.
Samtang, nagpadulong mismo sa DYHB ang bata ni Villanida agud klaruhon nga indi katapo sang NPA kag indi amasona ang iya iloy.
Suno kay Randy Villanida nga indi matu-od nga rebelde ang iloy bangud nga tigulang na ini.
Paathag pa dugang sang bata nga may yara gid man sang nag-sulod nga armado sa ila balay kag nagpangayo sang pagka-on kag gin-tatap naman sang iya iloy.
Gamay pa sila alagyan gid man sang rebelde ang ila balay, kag kalabanan nga may nagapangayo sang bulig kaangay sang pagkaon ilabi na sa tion nga may operasyon ang militar.
Ginbali niya man ang alegasyon sang militar nga team leader sang NPA ang iya amay nga si Romeo bangod ini gani ang katapo pa sang CAFGU sang una sa sulod sang napulo ka tuig kag nagtapos sa serbisyo sa tuig 2000. Ang amay sa karon ang indi na gani mainsendihan ang sitwasyon kag ulibata sa edad nga 60 anyos.
Sa interview sang dyHB kay Mercedita, indi matuod nga iya ang armas bangod nabilin gid lamang ini sang rebelde sang nag-agi ini sa ila nga balay. Suno sa iya nga nag-ayo pa gani ang mga rebelde nga magpangape rasun nga ang unod sang iya tyangge amu naman ang iya gintan-ay nga wala man gani nabayaran bangod nag-ako man ang mga NPA nga wala sila sang kwarta.
Ila pa gani gintanok ang iya inugbaligya nga saging kag kamote apang sa kahadlok wala naman ini nagreklamo bangod basi kabuhi niya pa ang kuhaon. /dyHB BACOLOD
