CADIZ CITY, NEGROS OCCIDENTAL – Gindagit sang budol-budol ang kapin 44 mil pesos nga balor sang alahas hain sa isa ka biktima nga negosyante sa ciudad sang Cadiz sadtong nagligad nga Martes sang aga.
Nakilala ang biktima nga si Leslie Villanueva, 37 anyos ang edad, pumuluyo sang Purok Mapainubuson, Brgy. Luna, Cadiz City.
Suno sa biktima nga mga las 11:30 sang aga sadtong Martes samtang nga ini siya ang yara sa atubangan sang simbahan sang Iglesia Ni Cristo sa Brgy. 3 sa amo nga ciudad, may nagpalapit sa iya nga duha ka mga babayi.
Pahayag sang ni Leslie nga nagpangabay ang mga suspek nga buligan sila mangita sang arkilahan nga salakyan agud kargahan sang isda nga igadul-ong sa Pala-pala diri sa ciudad sang Bacolod.
Samtang nga nagapangita sang salakyan, ginhambalan sang mga suspek ang biktima nga kon pwede sila makahulam sang kwarta agud ibayad sa renta, apang wala sang cash ang biktima gani gin-ayo sang mga suspek nga hulamon lang ang iya alahas.
Matapos nakuha ang alahas, naglakat ang mga suspek kag nagbilin sang bag sa biktima nga suno sa ila may unod nga kwarta kag ini ang ila lang balikan.
Na-orasan lang ang biktima sang hulat wala gid nakabalik ang mga suspek.
Nakuha sa biktima ang iya kulintas nga nagabalor 9k pesos, singsing nga nagabili 26 mil pesos kag aritos nga kapin 9 mil pesos./dyHB BACOLOD
