LA CARLOTA CITY, NEGROS OCCIDENTAL – Ginbuno patay ang isa ka soltero sang wala makilala nga supsek sang nagligad nga Sabado sang kagab-i sa ciudad sang La Carlota.
Nakilala ang biktima nga si Jojo Cervanles, 38 anyos ang edad, soltero kag pumuluyo sang Brgy. Yubo, La Carlota City.
Suno sa utod sang biktima nga pasado las 10 sang gab-i sadtong Sabado, July 21 sa ila lugar, nakibot sila sang nakita nga duguon na ang iya manghod gani dali-dali nila ini nga gindala sa ospital.
Apang pagka-las 4 sang kaagahon kahapon, Domingo July 22, ang biktima gin-deklarar nga patay sang attending physician sang Corazon Locsin Montelibano Memorial Regional Hospital nga si Dr. Jamal Portillo.
Nag-angkon sang pilas sa iya li-og ang biktima nga amo naman ang gintunaan sang iya kamatayon.
Sa karon padayon ang imbestigasyon nga ginpatigayon sang La Carlota City Police Station agud madakpan ang suspek nga naghimo sang amo nga krimen./dyHB BACOLOD
