CAUAYAN, NEGROS OCCIDENTAL – Ginbuno sang isa ka menor de edad ang 18-anyos nga biktima sa sulod sang baylihan sa Brgy. Tuyom, banwa sang Cauayan kagab-i.
Ang biktima ginkilala kay Jazz Omison, 18 anyos ang edad, soltero kag pumuluyo sang Brgy. Tuyom, Cauayan.
Samtang ang suspek isa ka 15 anyos nga bata nga pumuluyo sang Brgy. Isio, Cauayan.
Suno sa pagpangusisa sang Cauayan Municipal Police Station, may mga las 11:40 kagab-i durante nga nagapatigayon sang binayle sa sulod sang public plaza angut sa fiesta sa amo nga lugar, may duha ka grupo sang mga menor de dad nga nag-ilinaway.
Kalakip sa nagsumbaganay amo ang biktima kon diin ginapahayag sang pila ka witness nga sa tunga tunga sang away, nag gabot sang kutsilyo ang suspek kag ginhandus ang biktima.
Igo sa iya dughan ang naangkon ni Omison gani dali-dali ini nga gindala sa Kabankalan City District Hospital kag sang ulihi, ginsaylo sa Bacolod.
Samtang, gilayon naman nga nagpalagyo ang suspek matapos ang insidente./dyHB BACOLOD
