BACOLOD CITY, NEGROS OCCIDENTAL – Duha ang mga biktima sang pagtiro sa duha man ka separado nga insidente sa Bacolod City kag banwa sang Hinobaan ang ginpang-dangat sa regional hospital nga natabo kagab-i kag kaina sang kaagahon.
Sa Bacolod City, gintiro sang wala nakilala nga suspek ang isa ka 18 anyos nga lalaki may mga las 12:10 sini gid lamang nga kaaaghon sa Purok Paghidaet, Brgy. Tangub, Bacolod City.
Nakilala ang biktima nga si Raymart Abonales, residente sang Purok San Roque, Brgy. Tangub.
Suno sa asawa sang biktima, ginhaboy sang bato ang ila balay rason nga nag-gwa si Abonales, apang sang yara na sa gwa, hinali na lamang ini nga gintiro sang isa ka suspek nga naka-jacket kag naga-kalo.
Ang biktima naigo sa iya tuo nga kamot.
Sa banwa naman sang Hinobaan, gintiro ang isa ka soltero sang wala man nakilala nga suspek kagab-i sa ila man lamang balay sa Brgy. Pook, Hinobaan.
Nakilala ang biktima nga si Alvian Lasaleta, 22 anyos ang edad, pumuluyo sang amo nga lugar.
Ang insidente natabo may mga las 10:30 kagab-i kon diin padayon karon ang imbestigasyon sa motibo kag suspek nga nagtiro sa biktima.
Ang amo nga duha ka mga biktima ang lunsay ginpangdala sa Corazon Locsin Montelibano Memorial Regional Hospital./dyHB BACOLOD
